الحياة الكوفتسية

كثيرا ما نسمع مصطلح: الفتنة الطائفية ..وفي مصر بيترجم اوتوماتيكلي الى فتنة او خناقة او عركة بين المسلمين والمسيحيين 

امبارح فوجيء الجميع بموجة عارمة من السخرية بدأت بالسخرية من الإخوان والسلفيين ثم تطورت فأصبحت سخرية من بعض ثوابت الدين الإسلامي والسنن الثابتة عن النبي صلى الله عليه وسلم ثم انتهت بالرد بالسخرية من المسيحيين وعلى رأسهم البابا شنودة

لكن السؤال هو: ايه اللى خلى الموضوع يتطور لكل دة

البعض اعتقد ان الموضوع بدأه مسيحيون لكن للأمانة الذي بدأ هذا الهاشتاج هو مسلم للأسف الشديد كما يوضح هذا البيان من جوجل

هو كان بيقترح هاشتاج يبقى اسمه Y2015 # على واحدة كانت عايزة تعمل هاشتاج عن الحياة سنة 2015 لو الإخوان مسكوا الحكم وكل واحد يتخيل الحياة هيبقى شكلها عامل ازاى.. ودة من حقهم طبعا بس للأسف الكلام قلب الى عنصرية بغيضة مش بس ضد الاخوان لأ دة كمان ضد السلفيين زى الصورة اللى تحت دي

اذا كانت السخرية من اللحية والنقاب فاعلموا ان هذه من سنة النبي وزوجاته .. دة فقط للعلم

بعد كدة الناس خدتها الحماسة وبقت تسخر من ثوابت الدين وتذكر آيات قرآنية لدرجة ان اللى عمل الهاشتاج دة بدأ يشعر بالحرج والبنت انسحبت من المناقشة لأنها فعلا بقت قلة ادب مش مجرد ناس بتتخيل الحياة هتكون عاملة ازاى

وبقوا عاملين زى اللى حضر العفريت ومش عارف يصرفه ودة طبيعي ما هو انت ما تتوقعش انك هتتريق على ناس ومش هتدخل ترد ولا انك تفتح موضوع مثير للجدل وتقدر تسيطر عليه دة غير ان اشتراك مسيحيين في السخرية من الدين الاسلامي دة هيستفز ناس كتير جدا ومش بس السلفيين والاسلاميين هما اللى استفزوا لأ دة كل واحد منصف ومتزن انتقد الهاشتاج دة وقال يا جماعة كفاية

ولما حاول يقلب الموضوع ايجابي (مع ان دة ماكانش اصلا الغرض الاساسي من الهاشتاج) ويتكلم عن الايجابيات اللى ممكن تكون موجودة في مصر سنة 2015 فيه ناس اعترضت عليه وقالت يوه بقى يا كماحة انتو هتبوظوا الهاشتاج ليه بقى 

 الناس لما لقوا شتيمة وقلة ادب نازلة ترف عليهم ومسيحيين مشتركين في المعمعة وبيشعللوها اكتر زى ما هنوضح دلوقتي قالوا هما كمان طب اهو بقى خدوا شوية تريقة على الرموز المسيحية ..دة بعد ما كانت الناس في الاول بيبعتوا آيات قرآنية تحث على نبذ الفتنة وعدم الخوض في الدين والسخرية منه لكن لا حياة لمن تنادي .. ناس بتسخر من القرآن هتعظهم بالقرآن ازاى.. راحت التريقة شغالة على اساس بقى ان اللى يقبل التريقة على الاسلام والمسلمين مش المفروض يعارض التريقة على المسيحية مادام الموضوع بقى حرية رأى وكل واحد يقول اللى هو عاوزه

 لما حليمو اتريق على شنودة والظهورات قاله بطل جهل مع انه لسة من شوية كان بيتريق على النقاب!!

دلوقتي بقى الكلام بدأ يزعج بعض الناس اللى كانوا مبسوطين اوي من الهاشتاج طول ما هو تريقة على المسلمين بس زى اللى اسمه رامز دة اللى لما لقى المسلمين ابتدوا يردوا ويتريقوا قال تعالوا نسيبلهم الهاشتاج دة ونعملهم هاشتاج تاني يكون اسمه"سافل اوي" فميعرفوش ييجوا عليه .. وطبعا كل دة عشان التريقة تبقى على الاسلام بس لكن المسيحية لأ

طبعا الهاشتاج الفين وخمستاشر لازم يتوقف عشان بقى بربري وعليه هجوم على شنودة والمسيحية لكن قبل كدة كان دمه خفيف اوي

فكروني كدة هو ايه تعريف السفالة؟؟؟

المهم

بعد ما عمل هاشتاج تاني "سافل اوي"  - مع انه عايز يوقف الهاشتاج الاولاني عشان السفالة!!- ماحدش عبره وبقى قاعد يهوهو عليه لوحده ودخله ناس شتموه.. فبقى لازم يعمل حاجة تخلي الشتيمة دي تتوقف عشان ابوه شنودة اتشتم ودة ما يصحش .. الاخوان والسلفيين بس هما اللى يتشتموا

راح علطول اعلن عن وجود فتنة طائفية على تويتر بطريقة استغاثية - او ربما اعلانية- مع انه كان مشارك فيها وبيشعللها

وزى ما شفنا الموضوع ابتدى بتهريج وانتهى بفتنة طائفية ومش هلوم على المسيحيين اكتر ما هلوم على كل مسلم قبل ان دينه يتهان وقعد يشترك في السخرية منه بدعوى انها سخرية من التطرف!!. انا اعجب من ناس ما درستش دينها كويس مع ذلك قاعده تصنف ايه اللى تطرف وايه اللى اعتدال .. وواحدة داخلة في وسط الزحمة تقولك "بقدر طول اللحية بقدر طول الخسة" !!! 

طب يا حبيبة قلبي النبي عليه الصلاة والسلام كانت لحيته طويلة ولو كنتي مش بتحبي النبي او مش مسلمة فالمسيح كانت لحيته طويلة و شنودة لحيته قربت توصل لنص صدره

الناس بتهذي بكلام مش مستوعباه والقافية تحكم بقى.. مش واخدين بالهم ان حاجة ممكن تبتدي بهزار وتنتهي بفتنة كبيرة اوي مهما حاولتوا تهدوها ما تعرفوش لأن دايما بيكون فيه ناس بتشعللها

واخيرا بقى فيه واحد  كان عامل فيها عبيط!! كل ما واحد سلفي يفتح بقه يقول "هذه اخلاق السلفية" ولما رامز كان بيشتم شتايم قذرة وعمل هاشتاج "سافل اوي"  ما فتحش بقه بكلمه يقوله عيب بل بالعكس اعتذر للاقباط عن اخلاق السلفيين!!