يا شماتة أبلة ظاظا فيا

هبل وعبط وعته ؟
أحمدك يا رب

بقى حتة ماتش كورة اللى هيكسبه هيروح عشان يخسر في كأس العالم يعمل فينا كدة؟؟؟

تفاهة
تفااااااهة
والله العظيم عالم تافهة

رغم اني من اشد المعجبين بنظرية المؤامرة بس المرة دي الفتنة جاءت من الداخل

شوية مواقع و جرايد آخرها الواحد يمسح بيها ....
(طب اقولكم على فضيحة
في واحد في منتدى قال يفبرك خبر بيقول ان ساركوزي بيصلي عشان المنتخب الجزائري ما يكسبش وقال المصدر: سيفون سبورت
الواد بيهرج واعترف انه بيهرج بعد كدة
قام موقع اليوم السابع ما كدبش خبر راح ناشر الخبر دة
قووووم جريدة جزائرية راحت واخدة الخبر
قاااام السي ان ان يا وِلد هى روخرة نشرت الخبر
وكلهم قالوا نقلا عن سيفون سبورت واصلا مفيش حاجة اسمها سيفون سبورت

مش بقولك جرايد عايزة تترمي ويتشد عليها السيفون)

و شوية برامج لفريق المعاشات

قاعدين فاضيين قاموا قالوا يلا نجيب شوية اعلانات عشان السبوبة دي مش بتيجي كتير

على شوية شعوب سابوا كل مشاكلهم من فقر وجهل ومرض وغلاء اسعار واحتلال وراحوا عشان يجاهدوا في ملاعب الكرة وعلى الانترنت
وكلمة مني على كلمة مني
وشوية ضرب على شوية شتيمة وفي ناس ايه لسانها فارقلة


واحد جزائري معتوه قالك الى الجهاد في السودان
وواحد مصري معتوه بردو كتب على الفيس بوك للجزائريين انتو دمكم حلال!!!

دي كورة يا جدعان
كووووووووووورة
وبعدين نسأل احنا ما بنتقدمش ليه اهئ اهئ
وكلهم علينا ليه وتديني الشايب ليه انا وحشة ولا ايه
بص على الصورة دي وانت تعرف ما بنتقدمش ليه

(كل الازرق دولة واحدة)

ايام ما كنا كلنا تحت قيادة واحدة وراية واحدة وهدف واحد وكلنا ايد واحدة يا مرسي
ساعتها كنا مالكين الدنيا وبيعملولنا الف حساب
ايام ما كان ملوك اوروبا يبعتوا يترجوا الخليفة عشان يخلى ولادهم يدرسوا عندنا في الاندلس


ودلوقتي...


شايف التقسيم

في الوقت اللى هما بدأوا يتحدوا فيه بعد ما تعلموا ان الاتحاد قوة وما اتعلموش الدرس دة غير مننا احنا لانهم عمرهم ما كانوا متحدين اصلا

بقينا كل واحد مع نفسه ومش خايف غير على بلده ومصلحته
دلوقتي بقينا احنا اللى بنقف بالساعات امام السفارات الاجنبية في منظر مهين عشان يمنوا علينا بالفيزا ولو ما منوش بنرمي نفسنا في البحر عشان نروح عندهم

وقال ايه عاملينلك بتاع كدة قال اسمها جامعة الدول العربية ... بلا خيبة

Share on Facebook

في بلد الأزهر: النقاب لأ بس البيكيني عاتشي

واحدة قريبتي كانت بتعيد في شرم الشيخ وقالت لى ان الاجانب في الفندق اللى كانت قاعدة فيه كانوا بيقعدوا على البلاج توبليس Topless

يعني ايه الكلمة دي يا معلم؟؟؟؟

يعني عارف المايوه البيكيني ابو قطعتين دة اللى لامؤاخذة ما يتخيرش عن الملابس الداخلية لأى امرأة... اهو هما لابسين القطعة التحتانية منه فقط

بسسسسسسس؟

أه بسسسسسسسس

اللى فاقع مرارة اهلي بقى اني بعد كم يوم اقرأ في جريدة المصري اليوم ان شيخ الازهر اتشملل واتشطر واتنطط على واحدة بنت غلبانه في احد معاهد الازهر كل ذنبها انها ارادت ان ترتدي النقاب فأخذ يعنفها ويكسفها امام الناس حتى تخلع نقابها في وجوده بل وتجرأ وقال ان النقاب ليس من الاسلام في شيء وانه سيمنعه في المعاهد الازهرية . والراجل أخذته العزة بالجهل فقال لها انا افهم في الدين اكتر منك ومن اللى خلفوكي!!

قل لنا يا من تفهم في الدين اكتر من اللى خلفونا .. يا من منعت النقاب وابحت الربا وفوائد البنوك ففتنت اغلبية الشعب المصري بفتاويك.. لو كان النقاب ليس من الدين فما كان زى امهات المؤمنين؟؟؟؟؟

يعني زمان كنتم تيجوا تقولوا على استحياء لأ دة النقاب دة لأمهات المؤمنين بس ومش لبقية المسلمات.. بس دلوقتي الظاهر الزهايمر اشتغل او يمكن قلتوا تجربوا حظكم فأصبحنا نسمع عبارات غريبة مثل : النقاب ليس من الاسلام!!

طب عايزين نسأل سؤال : النساء الى كانوا بيلبسوا النقاب على عهد رسول الله دول جابوا فكرة النقاب دي منين اذا كان الله وصف لبس الجاهلية بانه تبرج .. يعني في الجاهلية النساء كانوا سافرات وغير محجبات اصلا ... النقاب اللى النبي ذكره في الحديث دة جه منين

المحرمة لاتنتقب ولا تلبس القفازين

الراوي: عبدالله بن عمر المحدث: الألباني - المصدر: صحيح أبي داود - الصفحة أو الرقم: 1826
خلاصة الدرجة: صحيح

يعني النساء كن ينتقبن في غير الاحرام على عهد رسول الله

هه جابوا النقاب دة منين لو لم يكن من الاسلام
واصلا هيتعبوا نفسهم ويلبسوه ليه لو لم يكن على الاقل مستحبا

ييجي واحد فهلوي زي مذيع قناة المحور ويسأل سؤال فهلوي زيه ويقول: طب مش اولى انهم يغطوا وجههم في الاختلاط والزحمة يقصد في الحج

طب وهو مين اللى قال لحضرتك انهم ما كانوش بيغطوا وجوههم في الحج
يعني دلوقتي حضرتك بتستر عورتك بالبنطلون او الجلابية لما ييجي الشرع في الاحرام ينهاك عن لبس ما فصل على قدر العضو بحيث يحيط به او ما يطلق عليه مجازا لبس المخيط هل معنى ذلك انك بتمشي بدون لبس خالص اى بدون ستر العورة ام انك تستبدل هذا اللبس بلبس آخر تنطبق عليه الشروط الشرعية للبس الاحرام مثل الازار الذي تلفه على جسدك من اجل ستر العورة؟؟؟؟؟
كذلك هو أمر المرأة في الاحرام فهى لا تلبس النقاب لكنها تستر وجهها بشيء آخر لا يكون مفصلا على قدر الرأس مثل ان تسدل من خمارها او جلبابها على وجهها

عندك دليل يا عم انت؟
اه عندي دليل يا عم انت

كان الركبان يمرون بنا ونحن مع رسول الله صلى الله عليه وسلم محرمات فإذا حاذوا بنا أسدلت إحدانا جلبابها من رأسها على وجهها

الراوي: عائشة المحدث: الألباني - المصدر: حجاب المرأة - الصفحة أو الرقم: 32
خلاصة الدرجة: صحيح

يعني يا استاذ فتح الباب أنت النبى نهى عن لبس النقاب ولم ينهى عن عن ستر الوجه في الاحرام وانما مثله مثل السروال او القميص يستبدل بما يؤدي نفس الغرض من ستر العورة

هييجي واحد باة من بتوع الزهايمر رجعتله الذاكرة فجأة فيقول أهه الحديث دة عن عائشة (رضى الله عنها) يعني امهات المؤمنين هما اللى كانوا بيغطوا وجوههم

نقول له اولا مبروك على رجوع ذاكرتك لك واعترافك ان النقاب اولا من الاسلام وان امهات المؤمنين كن يغطين وجوههن

ونكبسك بحديث آخر يطرحك ارضا ويثبت لك ان الامر لم يكن مقصورا على امهات المؤمنين فقط

كنا نغطي وجوهنا من الرجال ، وكنا نمتشط قبل ذلك في الإحرام .

الراوي: أسماء بنت أبي بكر المحدث: الألباني - المصدر: جلباب المرأة - الصفحة أو الرقم: 108
خلاصة الدرجة: على شرط مسلم

هذا الحديث روته أسماء بنت ابي بكر وهى طبعا ليست من نساء النبي ومع ذلك كانت تغطي وجهها

طيب واحد عايز دليل تاني نقوله احنا اثبتنا من شوية ان نساء النبى كن يغطين وجوههن

واذا قرأت معي هذه الآية الكريمة:

يَا أَيُّهَا النَّبِيُّ قُلْ لِأَزْوَاجِكَ وَبَنَاتِكَ وَنِسَاءِ الْمُؤْمِنِينَ يُدْنِينَ عَلَيْهِنَّ مِنْ جَلابِيبِهِنَّ ذَلِكَ أَدْنَى أَنْ يُعْرَفْنَ فَلا يُؤْذَيْنَ

فهده الآية قد جمعت بين أزاوج النبى وبناته وامهات المؤمنين بأنهن يرتدين نفس الزى وبذلك تزول حجة من يقول بأن امهات المؤمنين لهن لبس خاص يختلف عن بقية المسلمات
وعشان بس ماحدش يستنصح ويقول الآية بتقول يلبسوا جلاليب اى عبايات

وهما يعني كانوا بيلبسوا جينزات مثلا؟

اذا اردت ان تعرف معنى كلمة جلباب هنا فلترجع معي الى حديث ام المؤمنين عائشة الذي ذكرناه منذ قليل وتقرأ هذه العبارة:أسدلت إحدانا جلبابها من رأسها على وجهها

يعني الجلباب هذا كان يلبس على الرأس وكانوا يسدلونه (او كما قالت الاية يدنينه) على وجوههم، يعني مش جلابية او عباية بتتلبس عل الكتف زى ما انت فاهم لأ دة هى دي اللى انتوا بتقولوا عليها دلوقتي "الخيمة" وتقعدوا تسخروا من اللى بتلبسها وواحد ظريف يقولك بحس اني بقيت ماشي في ايران!

أظن بعد كل الكلام دة ما ينفعش ييجي واحد جاهل بيدعي انه بيفهم اكترمن اللى خلفونا ان يأتي ويقول ان النقاب ليس من الاسلام أصلا بل ويطلع واحد تاني ظريف جدا بردو يعمل كتاب ويقول فيه ان النقاب حرام!! وان المرأة التي تلبس الملابس العارية افضل من المنتقبة!!!

ولا حول ولا قوة الا بالله واللى يعيش ياما يشوف

أخيرا نحب نسمع تعليق العلامة، الامام الأكبر، شيخ الازهر، كبير المتدينين في البلد، رئيس مراجيح مولد النبي على موضوع الاجانب اللى لابسين من غير هدوم اللى حكينا عنهم فوق
واذا كنتم ستضعون قواعد وقنوانبن لمنع النقاب فمن باب اولى ان تضع بلد الازهر قوانين تجبر الاجانب وغيرهم على احترام عادات وتقاليد هذه الدولة الاسلامية وان تمنع ايضا البيكيني (الذي اصبح كمان نصف بيكيني ... مش عارفين هيروحوا فين بعد كدة... بس ما هى الدنيا حر هيعملوا ايه يعني) من ان يلبس على اراضيها

ولك الله يا مصر!!

Share on Facebook